Rom 9 | GbrGAW | STEP

Romans 9

A Israilayi Gado

1 – 2 – 3 ^{▼▼The text of verses 1-Rom 9:3 has been merged.} O, omi aza a Israila yi! O, om azaje Yahudiyi, shi mi n cei pma lo n mwa fya ɓe Kristi aba. Omi bugba wo mi shan lo, bugba yi wun mi n nyipyei n sukwoyi ntu n fye ɓo. Kristi kpelo, Zafun Gyi-gyi-yi kpelo, nge mi ta da egbe ɓeda nun, Sanu n ma cige mi yelo a mi gmiya n Shekwoyi ebe mi, ngye deye ɓa zhin fye fya bwa gni-gni. 4 Shekwoyi ku anya ga fye n mwa, ama fye ta wo wo lon. Wa kni fye n gye owo aza yeyeyi, wa kni fye wa gni fye busi n wo buzagna mwamwai, wa wufye shiwo n cei pma wa tu fye anabarka, wa ga fye owo awyidna ntu n fye a sese ɓo n na bai fya kpe enya n wo ye fya zhin. Wa fa fye fya zhin wo sujada wa ga fye alkawali a adnagmai. 5 Aza dnagmayi Shekwoyi anya efye zakwoyi nu Kristi nwohin, ɓei gmi nfye nuwo zhin Yahudiyi nu dna n nayi owo nwo gyibe tu n na anya she vinya nsaiye nyi. Mwa-mwa n Shekwoyi aba nyalo-nyalo.

6 To, Shekwoyi ta mi lo nu wa nuwo alkawali n na Yahudiyi abarn? Awo: (Ntuge alkawaliye zhin aza nya nu nɓa zhin a Yahudiyi hin-hin nyi.) Aza vinya nu to n na maɓa fi n na Yahudiyi fye, n ɓa zhin a Yahudiyi hin-hin. 7 Oɓa kun-kun n Ibrahim, ta zhin ɓa ɓa ze Ibrahim aɓin, Shekwoyi ɓeda, nku da nge alkawali zhin Ishaku, Ibrahim nugun anyanu, n Ishaku ayawyi yi. Koda yake Ibrahim ɓei n na aɓi ajeyi. 8 Kwa wu nu ge Ibrahim aɓi vinya nu to zhin Shekwoyi aɓin, ama aza nɓa ga alkawali gni-gni nya gaiciya n wo ɓei zhin Ibrahim nyi.

9 Shekwoyi ku alkawali zhin nge, “Ntna, oho n Saratu yi n ɓei ga fye oɓi”. 10 – 11 – 12 – 13 ^{▼▼The text of verses 10-Rom 9:13 has been merged.} Aye n mwa begye n navun sanu n wo nugun Ishaku ɓei la wo nyikwo la, owo nyikwo Rifkatu, woi la ga aɓi ma a-za-ba, Shekwoyi wa gna wo Isuwa oɓi n na ɓa ma kmisunyi nyi, wo ɓa zhin Yakubu owo mado bara. Dna n Shekwoyi ɓeda, “Mi la Yakubu kni ma tuwo anabarka to ge Isuwam”. Shekwoyi ɓei dace to ai ma aɓi yen, to ɓai kpe ɓemanayi ye n ɓenukwoyi n sapa. Wo to ɓei zhin ce ntu n naɓo nu n na ɓi ɓei zhin m, ama nya n Shekwoyi ɓei ye wa kni.

14 Shekwoyi ɓei zhin ɓenukwoyi nu? Awo. 15 Ntuge Shekwoyi ɓei ku gna Musa ge, n ɓa wu oza alheri n ma ye, magye oza sun-sun n ma ye. 16 Ntu lonu, Shekwoyi ta ga anabarka ntu ge oza kun ce wa bwa kwo nun, kwo wa zhin tnu-tnu n kala yi wa bwan, wo bwa ntuge, Shekwoyi gye oza sun-sun nu n wa ye ko n wa gye dama.

17 Firauna, Masar Esu ɓei zhin ɓesisi nu gaiciya ye nya. Ntuge Shekwoyi ɓei ku gnawo ge wo la Masar ebe ga wo ntuge wa wuwo Shekwoyi iko n wo tukwo. N nabai anyi vinya ɓa wo Shekwoyi eye mwa-mwa. 18 Ntu lonu fye gye, Shekwoyi wu azaho alheri ntu ge wo n cei pmanu, wa zhin azaho n na tukwoi kwa gnana to ɓa wo ɓon.

19 To, kni nu zhin Shekwoyi woi gye ɓa laifi, nge ɓata wo lo n ma? Ɓa to zhin oɓo n wa gna ɓa ge ɓa zhin?

20 Aʼa to dalo nun, Ho zhin kni nua ha zan Shekwoyi zanshin n laifi a? Enya n na zhin ko, kwo ɓa mi kwa gna oza n wa zhin kwo nyi ge kni na zhin hoi zhin mi n layia? 21 Sanu n oza mi shakun, wo to n ikoyi lo wa zhin apma n ezun yi gmanyi wa mi shakun manayi ntu n zhedu ɓo wa mido ntu n pashe fi ɓon? 22 Shekwoyi to n ikoyi lo wa wu wo minagyi n na aza tukwo n ɓa kuncelo a wuɓan, aza n wa zhin hakuri nɓai n sai mwa n? 23 – 24 Wo n zokwo yi lo-lo, nge eyi n na akuyi ze aza n wa ze owo mwa-mwa ya kpe ɓa, ko yi zhin a Yahudiyi nu, ko yi zhin abyedo nu, wa wuyi alheri n na bai aza vinya ɓa gye shi owo mwamwa nsun.

25 Fye pa lo enya n Hosia anabci a da? Shekwoyi wa cige, “Wo ɓa bwa abye do ga wohin (aza nɓa ta kun n na Yahudiyi byen) wa ye ɓa ko da yake oza to shin ɓa yen.” 26 Aza n na ɓei zhin ai ciɓa ge, “Fye to zhin omi aza nun,” aɓa yi ɓa nsai ge, Shekwoyi wye-wyei da aɓi.

27 Ishaya anabi ɓei da ɓo n na a Yahudiyi tukwo wa cige, Koda yake ɓa ɓa mwa begye ngye amwi n ela gbe, aza n bwasun ciwyi nu n ɓa ɓei pwo n ɓami. 28 “Ntuge Dagayi ɓei dawa n na anyi tukwo wa zo owo atnu-tnu n ɓai wa zun ɓa ya kpekpegye.”

29 Ishaya wa je gna n na abado nge nto n Shekwoyi sun-sun gyei nun, aɓei wu a Yahudiyi vinya, oɓa vinya shi aɓei wu aza vinya n ɓa ɓei fi n Sodon n Gomora zhimi nyi.

30 To, yi ɓa da ge nana n na ɓeye tukwoa? Yiɓa cige Shekwoyi la esa ga abye aje woi zhin ɓa gafara dna n gaiciya gami, ko da yake ɓa ta zan Shekwoyi zanshin. 31 Ama, a Yahudiyi n ɓa zhin atna ɓa bwa agni-gni manayi ntu n na awyidna bwashi ɓo, ɓato gyi nasaran. 32 Ntu n kniɓei nua? Ntuge ɓa ɓei zhin atna ɓa bwa gni-gni ntu n na awyidna bwashi n atnazhinyi ɓaze aza manayi maimakon ɓaga gaiciya, ɓaku ce bonyi n kuta bonyicenya dnagmayi. 33 Shekwoyi ɓo ku pma ɓa gna dna nwo ɓeda wa cige, “Mila Apma shi na a Yahudiyi zokwo, aza n mwa begye ɓa ce bonyi n wo (Yesu) aza n ɓa gawo gaiciya vinyikwo ta wo ɓam.”